人生下半場
林元生講於2005年台灣基督長老教會宣教140年忠僕團契
原文中文/林俊育2008/8翻譯，文見於台語信望愛《生活ê的台語，台語ê生活》
我一生中siōng大ê褔氣就是：iáu tī母腹內底ê時，就已經是基督徒ah。
自細漢我對信仰雖然m̄-bat懷疑過，卻mā m̄是一開始就熱心追求，無像現在摸會tio̍h神，伊講ê話每一句lóng深深感動我。我一直認為：chit-ê信仰就是我決定如何經營人生下半場ê siōng主要因素。
大部分人認為宗教lóng是勸人向善ê，但我boeh講，真正ê信仰是人kap神建立關係。今á日我boeh用「真、善、美」三個字來詮釋我所信仰ê神，分享伊如何hō͘我ê生命，koh真、koh善、koh美。
真
勸善是宗教起碼ê條件，假使宗教無勸善，就會kā人類帶入去萬劫不復ê境地。基督教ê信仰就是「Chhōe-tio̍h真神」。基督徒所認知ê魔鬼，就是ná烏社會ê人，只要你拜過魔鬼，伊就會掌握你ê 把柄。Á基督徒所信ê是koh真koh活ê真神，ē-tàng救咱脫離所有ê兇惡；只要你願意追求，就一定chhōe會tio̍h。
真神無所不知、無所不在，人mā無法度用家己ê理性去理解真神。長老教會tī台灣已經有140 gōa年ê歷史，巴克禮來台60年，á馬偕tī chit所在娶bó͘生kiáⁿ、建立長老教會，一生lóng獻hō͘台灣。Ē-sái講是，大多數長老教會ê信徒lóng已經bē記得巴克禮kap馬偕ê精神，á kan-ta會用理性來理解神。其實，神ê作為常常是出人意料之外ê，ē-tàng做你做bē到 ê事ê神，chiah是真神。所以，你kám iáu-beh去拜人手所雕刻ê偶像？信奉真神就無錯！你ē-tàng無kap基督徒仝款稱伊為上帝，但是，當你chhōe-tio̍h真神ê時，你一定ē-tàng擁有一個豐盛ê生命！
善
善是宗教ê另外一基本條件。舊約聖經內底對「善」ê詮釋真chē；á耶穌降世了後，tī新約內底對「善」ê描寫koh-khah徹底，其中一項是：thang為敵人祈禱！若咱每一個人lóng ē-tàng接受chit份善ê信仰，世上ê紛爭就ē-tàng化解，冤仇就ē-tàng消弭。
可能你mā bat聽過舊約聖經內底ê十誡，耶穌將伊「簡化」為二項：疼上帝kap疼人如己。若你ē-tàng掌握疼人如己，就ē-tàng明白基督教內底疼ê真諦kap善ê定義。
美
好ê信仰，真正ē-tàng為你ê生命帶來「美」。假使你ê信仰hō͘你終日目頭結結，án-ne你to̍h mài去傳褔音lah,因為人會感覺：若伊kap你同信一個信仰，he kám m̄是就變kah目頭結結？好ê信仰會hō͘你體會tio̍h：世上雖有苦難，但耶穌降生了後，伊beh為咱帶來喜樂kap平安。
基督徒ê肉體mā會破病，但當你去探病ê時，真正ê基督徒m̄-nā bē向你訴苦，顛倒會kap你分享神藉tio̍h病痛所賞賜ê恩典；即使重病臨終，mā會感謝神ê同在。
人生上半場
30年前我kap幾位朋友創業，創業有點á成績了後，公司ài我作總經理。我個人對高位無興趣，但因為需要，tùi án-ne我向公司講三年就好。無phah算，三年了後竟然因為市場因素soah「騎虎難下」。
終結紅包文化
「紅包文化」tī商場上kah-ná消滅bē-liáu，我mā真gông-gia̍h，為何談seng-lí一定ài送紅包leh?雖然m̄是人人lóng貪，但有kóa商家若無送紅包就有困難。我作總經理ê時就常耳聞有6-10家公司ê採購kap品管一定ài送紅包。但我kā幕僚講，chit項事一定tio̍h停止。雖然幕僚講，若無送紅包seng-lí可能就會無去，但我iáu是堅持，我boeh照我ê信仰來行事。因為我看tio̍h另外一個層面，真chē人認為送紅包ē-tàng解決問題，實際上是將公司帶入去災難。
頭家ài kā公司經營、管理好，特別是基督徒，就ài學習jú來jú聖潔、jú符合神ê旨意，聖經所教導ê，一定tio̍h勉力去行。因為人會犯罪，所以神kā耶穌賜hō͘世人，hō͘咱有悔改ê機會，有權柄得tio̍h神ê赦免。
後來阮停止送紅包了後，seng-lí並無減少。但mā因為án-ne,公司服務ê品質就koh-khah提昇、比別人koh-khah好。我對做業務ê講，若咱ê服務已經chiah-ni̍h好ah,á對方若iáu無滿意，án-ne咱mā m̄免遺憾，因為將來後悔ê會是in。
建立制度•奠好基礎
我想beh強調：做了六年ê總經理了後，照基督ê信仰行事，公司ê seng-lí m̄-nā無落，顛倒tī六年內底成長了四倍，á內部該建立ê制度mā tī hit段時間中建立好勢，奠定了未來ē-tàng做得koh-khah好ê基礎。
換句話來講，制度好，成長就bē有siuⁿ大ê問題。Hit時阮將內部ê品管、生產線等制度lóng以國際化ê標準來訂定，甚至聘請國際性ê企管公司來幫忙企劃工廠kap公司ê管理（tī hit當時iáu無流行chit種ê事）。
服事神從來m̄-bat停過
等公司真正穩定進入軌道了後，我開始思考如何tī 50歲chìn前ē-tàng有koh-khah chē時間服事神。Tī chia我想kā眾基督徒講，我並m̄是等到50歲chiah開始服事神。事實上，即使平日無閒事業，tī工作ē-tàng負荷ê情況下，我iáu tī教會作了14年半ê主日學校長。Chit十gōa年中間雖然比較khah無閒，mā付出了代價，但我kap神ê關係kap對聖經ê認bat卻深入bē少。因為身為主日學老師，就有「催逼」家己好好á研習kap預備教材ê責任，á神mā hō͘我透過聖經ê知識，hō͘神kap我ê生命有khah súi ê連結。
服事tio̍h 趁早開始，隨時lóng thang進行
服事tio̍h 趁早開始，隨時lóng thang進行。若一個gín-á從來m̄-bat hō͘伊做家事，長大了後ài伊做就無容易loh。服事亦是án-ne,對基督徒來講，無論身分或年紀，服事kap傳褔音ná親像phah籃球或siû水，lóng是基督徒ê基本動作。基本動作養成了後，什麼時什麼所在lóng thang傳褔音，無一定tio̍h等到進入人生下半場後chiah著手。
什一奉獻
聖經ê話語hō͘我回想起早年ê人生。瑪拉基書內底提起基督徒ài做「什一奉獻」（薪水撥出十分之一作為奉獻），我tī領第一份薪水時就已開始什一奉獻，但只是照聖經ê教導做，無想kah真清楚。後來chiah發現，神講，你只要奉獻十分之一，伊就beh phah開天窗來祝褔你。感謝神！我án-ne做了後，神真是大大地賜褔hō͘我！守神ê誡命是無條件ê，只要神tio̍h用ê，就應當奉獻。以上是我人生上半場ê思維。
人生下半場
我因為基督信仰來行入社會。但為何我boeh調整人生ê下半場neh?30年前我teh創業ê時，就立落來一個志願：只要我thàn tio̍h錢，就一定會為社會做kóa tāi-chì，但我無希望tī老眼昏花、口齒不清ê時chiah獻身hō͘上帝。
有人規劃家己人生ê下半場是去讀神學院，將來ài做牧師。但我boeh提醒：你ê身軀況狀kám良好？你是因為世俗ê工作無順利chiah想beh「換走道」mah?我m̄是反對人讀神學院，卻是心態有爭議。Tī調整人生下半場ê時，需要思考以下幾點：
1. 對家己kap社會有幫助
服事神ê態度一定會真清楚，m̄是toh一pêng做了無好chiah beh來做另外ê事。Tī公司chiah-ni̍h chē年來，同仁因貪污á hō͘我「請行路」ê約有三、四人，á我會做chit-ê決定，其實是幫助in,mā是teh幫助社會。無論做任何tāi-chì，即使tī規劃調整人生下半場ê時，mā應該持守chit種ê心態──ài對家己、對社會有幫助。
有了chit種ê理念，我想我就ē-tàng幫企業或機構做調整。若kā企業管理ê原則以及歐美公司管理ê理念帶到教會，必定ē-tàng幫助台灣教會ê宣教kap服務機構ê慈善工作。
2. 學習bòai/mài掌聲
位居高位ê人有真chē機會hō͘別人ê奉承kap扶tháⁿ，但he lóng是虛無ê。將總經理ê位á交棒了後，我並無想beh參與siuⁿ-chē公司ê事務，但董事長卻希望我koh擔重任。我kā伊講，應該hō͘新人有機會起來；而且我想beh做服事神ê工作，若負責siuⁿ-chē事務，就無時間服事神loh。
3. 過簡樸ê生活
人thàn tio̍h ê錢無一定tio̍h全部花完，會曉過簡樸生活（simple life)chiah會曉感恩。真chē人tùi職場第一線退落來了後，lóng會面臨退休症候群，無法度適應。Á基督徒siōng-súi ê所在就是：隨時隨地lóng ē-tàng感恩，用感恩ê心來面對各樣ê困難。
4. 設定優先kap授權
雖然我現在掛名副董事長，但每三個月chiah kap幹部開一pái會，年度計劃有總經理kap幕僚teh籌策，我就充分授權，hō͘ in儘情發揮。
我真重視服事ê優先次序，因為chhōe我捐款ê人kap活動相當chē，á人ê時間、金錢kap能力實在真有限，不得不tī特定ê範圍內去排出優先順序。會曉排出輕重緩急，生活chiah bē burn o͘t(耗竭）。基督徒mài驚面對問題，只要kā優先次序定好，一定ē-tàng tī神ê應允內底成就kap解決。
5. 適時地講ＮＯ！
只要無tī你優先範圍ê事，lóng thang選擇暫緩或不做。「忠僕團契」ê異象kap聚會hō͘我願意kā時間khǹg tī kap未信ê朋友分享人生kap信仰。即使只有一人因為聽我ê分享á信耶穌，我lóng感謝神！
各位iáu未信ê眾朋友，thang知lín ê生命對神來講有jōa重要？聖經內底有記載：有一個人被鬼附身，去求耶穌趕鬼。Hit陣鬼beh被趕出來ê時，看見邊á有一大陣豬teh食物件，鬼就要求耶穌講：「若kā阮趕出去，就打發阮進入豬群pah。」耶穌講：「去pah。」鬼就出來，進入豬群，忽然全群豬闖落去山崖，lóng投入海裡淹死去。
神藉tio̍h chit段故事kā咱講：神看重你，ài hō͘你成做新造ê人，生命更新，有新ê生活kap堅定ê信仰。
6. Chhōe志同道合ê朋友
Ē-tàng kā人生下半場安排得好，有賴志同道合ê朋友同齊工作，無論是從事社會褔利、教會宣教或靈命更新，只要hō͘神改變，生命一定會無仝款；á chit中間一定會有志同道合ê朋友，tī軟弱ê時、困難ê時，thang互相支援kap扶持。Siōng重要ê是：這是神hō͘咱ê誡命─kap人和好，kā事做tio̍h，有好見證。
神疼你，tī你未出生chìn前，伊對你ê生命就已經有安排。你相信祂就無m̄-tio̍h！